ഭക്ഷണവും വെള്ളവും

ചെന്നൈയിലും ആസ്സാമിലുമൊക്കെ പ്രളയമുണ്ടായ സമയത്ത് കേരളത്തിൽ നിന്നും ഭക്ഷണവും വെള്ളവും അങ്ങോട്ടയക്കുന്നത് ശരിയല്ല എന്ന് ഞാൻ പലവട്ടം പറഞ്ഞിരുന്നു. ദുരന്ത പ്രദേശങ്ങളുടെ അടുത്ത പ്രദേശങ്ങളിൽ തന്നെ ഈ വസ്തുക്കൾ കിട്ടാനുണ്ടാകുമെന്നും പണം അയച്ചുകൊടുത്താൽ അവിടെ നിന്നും വാങ്ങാമെന്നും, ദുരന്തകാലത്ത് കുറച്ചു പണം ലോക്കൽ എക്കോണമിയിൽ എത്തുന്നതാണ് എല്ലാവർക്കും നല്ലത് എന്നുമെല്ലാമാണ് ഇതിന് കാരണമായി ഞാൻ പറഞ്ഞത്. പക്ഷെ, അടുത്ത സുഹൃത്തുക്കൾക്ക് പോലും അക്കാര്യം ഇഷ്ടപ്പെട്ടില്ല.