ശശി തരൂർ, കോൺഗ്രസ്സ്, ഇന്ത്യ!

ഓപ്പറേഷൻ സിന്ദൂർ നടന്ന ദിവസങ്ങളിലും അതിന് ശേഷവും ആ വിഷയത്തെ വിലയിരുത്തി ഏറ്റവും നന്നായി സംസാരിച്ചത് ശ്രീ. ശശി തരൂർ ആയിരുന്നു.

എനിക്കതിൽ അത്ഭുതമൊന്നും തോന്നിയില്ല. അന്താരാഷ്ട്രരംഗത്ത് മുപ്പതിലേറെ വർഷം പ്രവർത്തിച്ചിട്ടുള്ള, ഒരുപാട് സംഘർഷങ്ങളുടെ കാലത്ത് യു.എൻ. സെക്രട്ടറി ജനറലിന്റെ വക്താവായിരുന്ന അദ്ദേഹത്തിന് കാര്യങ്ങളെ വേണ്ട തരത്തിൽ വിശകലനം ചെയ്യാനും മാധ്യമങ്ങളുടെ മുന്നിൽ അളന്നുകുറിച്ച വാക്കുകളിൽ സംസാരിക്കാനും അറിയാമെന്ന് എത്രയോ പ്രാവശ്യം തെളിയിച്ചിട്ടുള്ളതാണ്.

ശ്രീ. ശശി തരൂരിന്റെ പ്രസ്താവനകളെ ഇന്ത്യൻ മാധ്യമങ്ങൾ മാത്രമല്ല ലോക മാധ്യമങ്ങൾ തന്നെ ശ്രദ്ധിച്ചിരുന്നുവെന്നും അദ്ദേഹം വിഷയം അവതരിപ്പിച്ചതിലെ കൃത്യത ബഹുഭൂരിഭാഗം ഇന്ത്യക്കാർക്കും ഇഷ്ടപ്പെട്ടുവെന്നും സോഷ്യൽ മീഡിയ ശ്രദ്ധിച്ചവർക്ക് മനസ്സിലായി. മനസ്സിലാകാതിരുന്നത് അദ്ദേഹത്തിന്റെ വിശകലനങ്ങളോട് കോൺഗ്രസ്സ് പാർട്ടി പ്രതികരിച്ച രീതിയാണ്.

“കോണ്‍ഗ്രസ് നേതാവ് ശശി തരൂരിന് പാര്‍ട്ടി നേതൃത്വത്തിന്റെ താക്കീത്” എന്നാണ് മലയാള മാധ്യമങ്ങൾ റിപ്പോർട്ട് ചെയ്തത്. “പാര്‍ട്ടിയുടെ അഭിപ്രായങ്ങള്‍ പൊതുസമൂഹത്തില്‍ അറിയിക്കുമ്പോള്‍ ശ്രദ്ധിക്കണമെന്നും വ്യക്തിപരമായ അഭിപ്രായങ്ങള്‍ പറയാനുള്ള സമയമല്ല ഇതെന്നും നേതൃത്വം വ്യക്തമാക്കി. തരൂര്‍ പരിധി ലംഘിച്ചെന്ന് മുതിര്‍ന്ന നേതാക്കളുടെ യോഗത്തില്‍ വിമര്‍ശനമുയര്‍ന്നു.” ഇങ്ങനെ പോകുന്നു വാർത്ത.

സത്യത്തിൽ അമ്പരപ്പാണ് തോന്നിയത്. നാടിന്റെ വികാരത്തോട് ചേർന്നുനിന്ന് ഒരാൾ സംസാരിക്കുന്നു. പാർട്ടി ഭേദമന്യേ അദ്ദേഹത്തിന് സമൂഹത്തിന്റെ പിന്തുണ ലഭിക്കുന്നു. അങ്ങനെ ഒരു സാഹചര്യത്തിൽ ആ നേതാവിനെ പരമാവധി പിന്തുണക്കുകയും ഇത്തരത്തിലുള്ള സംഘർഷവും വിദേശകാര്യവും ഉൾപ്പെട്ട വിഷയത്തിൽ പാർട്ടിയിലെ ഏറ്റവും പരിചയ സമ്പന്നനും കൃത്യമായി സംസാരിക്കാൻ കഴിവുമുള്ള അങ്ങനൊരാളെ നിയോഗിക്കുകയുമല്ലേ വേണ്ടത്?

ഇന്നത്തെ വാർത്തകൾ ശരിയാണെങ്കിൽ തീവ്രവാദത്തിന്റെ വിഷയം അന്താരാഷ്ട്ര രംഗങ്ങളിൽ തുറന്നുകാട്ടാനുള്ള ഇന്ത്യൻ സംഘത്തിന്റെ നേതൃത്വത്തിലേക്ക് ശ്രീ. തരൂരിനെ ഇന്ത്യൻ സർക്കാർ പരിഗണിക്കുന്നു എന്നാണ് മനസ്സിലാക്കുന്നത്. ഇത് അദ്ദേഹത്തിന്റെ പ്രഭാഷണപാടവത്തെയും അന്താരാഷ്ട്രരംഗത്തുള്ള അറിവിനെയും ബന്ധങ്ങളെയും രാജ്യത്തിന് വേണ്ടി ഉപയോഗിക്കുന്നതോടൊപ്പം രാഷ്ട്രീയത്തിനതീതമായ തീരുമാനങ്ങളാണ് സർക്കാർ എടുക്കുന്നതെന്ന് സമൂഹത്തെ ബോധ്യപ്പെടുത്തുകയും ചെയ്യുന്നു. സത്യമാണെങ്കിൽ അഭിനന്ദനാർഹമായ തീരുമാനമാണ്.

അന്താരാഷ്ട്ര വിഷയങ്ങളിൽ ഇന്ത്യയിൽ ഏറ്റവും പരിചയസമ്പത്തും ലോകത്താകമാനം രാഷ്ട്രീയ, നയതന്ത്ര, മാധ്യമരംഗങ്ങളിൽ ഏറ്റവും കൂടുതൽ വ്യക്തിബന്ധങ്ങളുമുള്ള ശ്രീ. ശശി തരൂരിന് അദ്ദേഹത്തിന്റെ കഴിവുകൾ രാജ്യത്തിന് വേണ്ടി ഉപയോഗിക്കാനുള്ള അർഹമായ ഒരു സ്ഥാനം ഇനിയും നമ്മൾ നൽകിയിട്ടില്ല എന്ന് ചിന്തിക്കുന്ന അനവധി ആളുകൾ ഇന്ത്യയിലുണ്ട്. ഞാൻ അത്തരത്തിൽ ഒരാളാണ്. എന്നിട്ടും ഇതൊന്നും കാര്യമാക്കാതെ അദ്ദേഹം സർക്കാർ പദവികൾ ഉള്ളപ്പോഴും ഇല്ലാത്തപ്പോഴും തന്റെ ഉജ്ജ്വലമായ ധിഷണകൊണ്ടും, വിശകലന പാടവം കൊണ്ടും, സംഭാഷണ ചാതുരികൊണ്ടും വേറിട്ട് നിൽക്കുന്നു, നാടിന് വേണ്ടി പ്രവർത്തിക്കുന്നു, സംസാരിക്കുന്നു.

ഇന്നത്തെ വാർത്ത ശരിയാകണമെന്ന ആഗ്രഹമാണ് എനിക്കുള്ളത്. മാത്രമല്ല, ശ്രീ. ശശി തരൂരിന് അദ്ദേഹത്തിന്റെ കഴിവിന് യോജിച്ച പദവികൾ ഇനിയും ലഭിക്കട്ടെ എന്ന് ആഗ്രഹിക്കുന്നു, ആശംസിക്കുന്നു.

മുരളി തുമ്മാരുകുടി