ഒരു രാജ്യത്തെ കറൻസിയുടെ വില ഇന്ത്യൻ രൂപയേക്കാൾ കുറവാണെങ്കിൽ അവിടുത്തെ സമ്പദ്‌വ്യവസ്ഥ നമ്മളുടേതിനേക്കാൾ മോശമായിരിക്കുമെന്നും അവിടെ ജീവിക്കാൻ നമുക്ക് ചിലവ് കുറവായിരിക്കുമെന്നുമുള്ള ചിന്ത സാധാരണക്കാർക്കുണ്ട്. ഈ തെറ്റായ പൊതുബോധത്തെ ഉറപ്പിക്കുന്ന ലേഖനങ്ങൾ കാണുമ്പോൾ വിഷമം തോന്നും.
വാസ്തവത്തിൽ ഒരു രാജ്യത്തെ കറൻസിയുടെ വിലയും, അവിടുത്തെ സമ്പദ്‌വ്യവസ്ഥയുടെ ശക്തിയും, ശരാശരി ജീവിതച്ചെലവും, ആളുകളുടെ വരുമാനവും തമ്മിൽ ഒരു ബന്ധവുമില്ല.
വളരെ ജീവിതച്ചെലവുള്ള, ആളുകൾക്ക് നല്ല ശമ്പളമുള്ള, ശക്തമായ സമ്പദ്‌വ്യവസ്ഥ ഉള്ള രാജ്യങ്ങൾക്കും വളരെ ‘വില കുറഞ്ഞ’ കറൻസി ഉണ്ട്. ഏറ്റവും നല്ല ഉദാഹരണം ദക്ഷിണ കൊറിയ ആണ്. ഒരു ഇന്ത്യൻ രൂപക്ക് പതിനാറ് ദക്ഷിണ കൊറിയൻ വോൺ കിട്ടും. പക്ഷെ ഇന്ത്യയിൽ നൂറു രൂപക്ക് ലഭിക്കുന്ന വസ്തുക്കൾ അവിടെ ആയിരത്തി അറുനൂറു രൂപക്ക് ലഭിക്കില്ല. രണ്ടു രാജ്യങ്ങളിലും ലഭ്യമായ ഒരു വസ്തുവിന്റെ വില താരതമ്യപ്പെടുത്തിയാൽ നമുക്കിത് ബോധ്യപ്പെടും. ഇന്ത്യയിൽ ഒരു മാക് ബർഗറിന്റെ വില 250 രൂപ ആകുമ്പോൾ ദക്ഷിണകൊറിയയിൽ അത് ഏഴായിരം വോൺ ആണ്. അപ്പോൾ കറൻസിയുടെ മൂല്യം കുറഞ്ഞതുകൊണ്ട് നമുക്ക് യാതൊരു ലാഭവുമില്ല. ദക്ഷിണകൊറിയയിൽ യാത്ര ചെയ്തിട്ടുള്ള ആർക്കും ഇക്കാര്യം അറിയാം.
നേരെ തിരിച്ചും ഉണ്ട്.
മധ്യേഷ്യയിലെ ഏറ്റവും താഴെ നിൽക്കുന്ന സമ്പദ്‌വ്യവസ്ഥയിൽ ഒന്നാണ് ജോർദ്ദാൻ. ആളോഹരി വരുമാനം അയ്യായിരം ഡോളറിന് താഴെ (PPP വച്ച് നോക്കിയാൽ 10,000). ഖത്തറിലെ ആളോഹരി വരുമാനം 80,000 ഡോളർ ആണ് (ppp വച്ച് നോക്കിയാൽ 130,000) പക്ഷ ഒരു ജോർദാൻ ദിനാർ കൊടുത്താൽ അഞ്ചു ഖത്തറി റിയാൽ കിട്ടും. അപ്പോൾ ഖത്തറിൽ വന്നാൽ ജോർദ്ദാനികൾ സമ്പന്നരാണെന്ന് കരുതുന്നത് ശുദ്ധ മണ്ടത്തരമാണ്).
ആളോഹരി വരുമാനം, പർച്ചേസിംഗ് പവർ പാരിറ്റി, ജി.ഡി.പി., ജി.ഡി.പി. യുടെ വളർച്ച നിരക്ക്, കറൻസിയുടെ മൂല്യം, കറൻസിയുടെ മൂല്യത്തിന്റെ മാറ്റം, ഇവയെപ്പറ്റിയുള്ള തെറ്റിദ്ധാരണകൾ ഉണ്ടാക്കുന്ന ലേഖനങ്ങൾ ഞാൻ കുറെ കാലം മുതൽക്കേ കാണുന്നതാണ്. അതുകൊണ്ടുതന്നെ ഒരു ലേഖനം കൊണ്ട് ഇത് അവസാനിക്കുമെന്നും തോന്നുന്നില്ല. കണ്ടപ്പോൾ വെറുതെ പറഞ്ഞു എന്നേ ഉള്ളൂ. രൂപയുടെ വിനിമയമൂല്യം നോക്കി യാത്രചെയ്യാൻ രാജ്യം തെരഞ്ഞെടുത്താൽ പോക്കറ്റ് കീറും.
മുരളി തുമ്മാരുകുടി
Leave a Comment