ഫ്ളാറ്റുകളിലെ അഗ്നിബാധ

ഹോങ്കോങ്ങിലെ അഗ്നിബാധയുടെ വാർത്തകൾ വായിക്കുന്നു. ആധുനികമായ കെട്ടിടനിർമ്മാണ നിയമങ്ങളും ആധുനികമായ അഗ്നിസുരക്ഷാ സംവിധാനങ്ങളും പരിശീലിപ്പിക്കപ്പെട്ട ഫയർഫോഴ്സും ഒക്കെ ഉള്ള സ്ഥലമാണ്, എന്നിട്ടും അഗ്നിബാധ ഉണ്ടായി, ഒരു ഡസനിലേറെപ്പേർ മരിച്ചുകഴിഞ്ഞു. അഗ്നിബാധയുടെ സ്കെയിൽ കണ്ടിട്ട് മരണസംഖ്യ ഉയരുമെന്നാണ് തോന്നുന്നത്.

കേരളത്തിൽ ഒരു ബഹുനിലക്കെട്ടിടത്തിൽ അഗ്നിബാധ ഉണ്ടാകാനുള്ള സാധ്യതയെപ്പറ്റി പലപ്രാവശ്യം പറഞ്ഞിട്ടുണ്ട്. അതുകൊണ്ടുതന്നെ ഞാൻ ഈ വിഷയം വീണ്ടും പറയുമ്പോൾ, “പുലി വരുന്നേ” എന്ന് വിളിച്ചുപറഞ്ഞ കുട്ടിയുടെ അവസ്ഥയാണ്, ആരും ശ്രദ്ധിക്കില്ല. പുലിക്കഥയിലെ ഏറ്റവും പ്രധാനമായതും, നമ്മൾ അധികം ശ്രദ്ധിക്കാത്തതുമായ കാതൽ, അവസാനം പുലി വന്നു എന്നതാണ്!

കേരളത്തിൽ ബഹുനിലക്കെട്ടിടങ്ങളുടെ എണ്ണം കൂടുന്നു. അതേ സമയം അഗ്നിസുരക്ഷയെപ്പറ്റിയുള്ള അവബോധമോ, അഗ്നിബാധ ഉണ്ടായാൽ കൈകാര്യം ചെയ്യാനുള്ള കഴിവോ ഫ്ലാറ്റ് നിവാസികൾക്ക് ഇല്ല. ബഹുഭൂരിപക്ഷം ഫ്ലാറ്റ് നിവാസികളും ആദ്യമായിട്ടാണ് ഇത്തരം കെട്ടിടങ്ങളിൽ താമസിക്കുന്നത്. നിലത്തുള്ള ഒറ്റവീട്ടിൽ താമസിച്ചിരുന്നപ്പോൾ ഉണ്ടായിരുന്ന ശീലങ്ങൾ ഫ്ലാറ്റിലും തുടരുകയും ചെയ്യുന്നു. ആധുനിക ഫ്ലാറ്റ് സമുച്ചയങ്ങളിലുള്ള ഫയർ അലാം സംവിധാനങ്ങൾ പ്ലാസ്റ്റിക്ക് കവർ ഇട്ടു മൂടിയും ബാറ്ററി മാറ്റിവെച്ചും വീട്ടിൽ പുകയുണ്ടാക്കുന്ന പാചകവും പ്രാർത്ഥനയും നടത്തുന്നു. ഫ്ളാറ്റിലെ അഗ്നിസുരക്ഷ ഉപകരണങ്ങൾ ഉപയോഗിക്കാൻ ഫ്ലാറ്റ് നിവാസികൾക്ക് മാത്രമല്ല സെകുരിറ്റിക്ക് പോലും അറിവില്ല. ഓരോ വീട്ടിലും കിടപ്പു രോഗികളോ കേൾവിശക്തി കുറഞ്ഞവരോ മറ്റുള്ളവരുടെ സഹായമില്ലാതെ രക്ഷപെടാൻ കഴിയാത്തവരോ എത്ര ഉണ്ടെന്ന് സെക്യൂരിറ്റിക്കോ കമ്മിറ്റിക്കാർക്കോ ഒരു അറിവുമില്ല. ഒരപകടം ഉണ്ടാകുന്നത് വരെ ഇതൊന്നും ഒരു വിഷയമല്ല.

അപകടം, നിർഭാഗ്യവശാൽ, ഉണ്ടാകും. ഇതുവരെ ഉണ്ടാകാത്തത് ഭാഗ്യം, പക്ഷെ ഭാഗ്യം എക്കാലത്തും തുണക്കില്ല. അതുണ്ടാകുന്നതിന് മുൻപ് ഈ വിഷയത്തിൽ കൂടുതൽ ശ്രദ്ധിച്ചാൽ നന്ന്.

ഫ്ളാറ്റുകളിലെ സുരക്ഷയെപ്പറ്റി ഞാൻ എഴുതിയ ലഘുലേഖ – http://kathakal.muraleethummarukudy.com/…/safety-of… ഒന്ന് വായിച്ചിരുന്നത് നല്ലതാണ്.

മുരളി തുമ്മാരുകുടി

BBC News image credit.