ആരുടെ അമ്മ?

മലയാളത്തിലെ സിനിമാതാരങ്ങളുടെ സംഘടന A M M A യെ പറ്റി കേൾക്കുന്ന കാര്യങ്ങൾ പേടിപ്പിക്കുന്നു.

ആ സംഘടനയിലെ ഭാരവാഹികൾ ആയ/ആയിരുന്ന നടൻമാർ സ്ത്രീകളോട് അപമര്യാദയായി പെരുമാറി, ബലാത്സംഗം വരെ ചെയ്തു എന്നുള്ള ആരോപണം വരുന്നു. ആരോപണ വിധേയർ  ഓരോരുത്തരും വ്യക്തിപരമായി അതിന് മറുപടി പറയേണ്ടി വരും, അതിജീവിതമാർ കേസുമായി മുന്നോട്ട് പോയാൽ വിചാരണയും നേരിടേണ്ടി വരും.

ആരോപണവിധേയനായ സിദ്ദിഖ് സെക്രട്ടറി സ്ഥാനം രാജിവെച്ച സ്ഥിതിക്ക് ഇനി ഭാരവാഹികളുടെ ആരുടെയെങ്കിലും പേരുണ്ടായാൽ അവരും രാജിവെച്ച് അന്വേഷണം നേരിടുമെന്ന് കരുതാം. അത് ശരിയായ കാര്യമാണ്.

A M M A യിലെ ഒരു അംഗത്തിനെതിരെ ആരോപണം വന്നാൽ സംഘടന എന്ത് ചെയ്യും എന്നറിയാൻ താല്പര്യമുണ്ട്. ആരോപണം പരാതിയായി കോടതിയിൽ തെളിയിക്കപ്പെടുന്നത് വരെ ആരോപണവിധേയനെ പിന്തുണക്കുമോ? ആരോപണത്തെ നേരിടാൻ അംഗത്തെ സഹായിക്കുമോ?

ആരോപണം ഉന്നയിച്ചത് A M M A യിലെ അംഗമാണെങ്കിൽ എന്ത് നിലപാടായിരിക്കും എടുക്കുക? അവർക്ക് പിന്തുണ നൽകുമോ? ആരോപണം പരാതിയായി എഴുതിക്കൊടുത്ത് നിയമം അനുശാസിക്കുന്ന പരമാവധി ശിക്ഷ പ്രതിക്ക് നേടിക്കൊടുക്കാൻ അതിജീവിതയെ സഹായിക്കുമോ? ഇനി എപ്പോഴെങ്കിലും A M M A യുടെ ഭാരവാഹികൾ മാധ്യമങ്ങളെ കാണുമ്പോൾ ഇക്കാര്യം ഒന്ന് ചോദിക്കണം.

പുതിയതായി വരുന്ന ആരോപണങ്ങൾ സംഘടനയെ സംബന്ധിച്ചിടത്തോളം കൂടുതൽ ഗുരുതരമാണ്. കാരണം അത് സംഘടനയിലെ അംഗങ്ങളെ പറ്റിയല്ല, അംഗത്വത്തെ പറ്റിയാണ്.  A M M A എന്ന സംഘടനയിൽ അംഗത്വം ലഭിക്കുന്നതിന് വേണ്ടി പോലും “അഡ്ജസ്റ്റ്മെന്റ്” ചെയ്യണമെന്ന് ആവശ്യപ്പെട്ടു എന്ന്, A M M A യുടെ അംഗത്വത്തിന്റെ ഫോം പൂരിപ്പിക്കാൻ വീട്ടിൽ ചെന്ന നടിയെ കൺസെന്റ് ഇല്ലാതെ ചുംബിച്ചു എന്ന്, എതിർപ്പ് കാണിച്ചതുകൊണ്ട് അംഗത്വം നൽകിയില്ല എന്നൊക്കെയാണ് ആരോപണങ്ങൾ. സത്യമാണെങ്കിൽ ധാർമ്മികമായി എത്ര ജീർണ്ണമാണ് ഈ പ്രസ്ഥാനം? പുതുമുഖങ്ങളുടെ കരിയർ നിർമ്മിക്കാനും തകർക്കാനും കഴിവുള്ളവർ കൂട്ടായ്മയിൽ ഉണ്ടെന്നുള്ള ബലത്തിൽ, അവരോടുള്ള അടുപ്പത്തിന്റെ പേരിൽ, എത്ര പച്ചയായിട്ടാണ് ഭാരവാഹിത്തം വഹിക്കുന്നവർ  ലൈംഗികമായ പ്രത്യുപകാരം ആവശ്യപ്പെടുന്നതെന്ന് അതിജീവിതമാർ പറയുന്നത്?

മറ്റു കേസുകളിൽ എന്ന പോലെ ഈ കേസിലും തീർച്ചയായും അന്വേഷണങ്ങൾ നടത്തണം. പക്ഷെ ഇതിലേക്കുള്ള അന്വേഷണം വ്യക്തികളിൽ മാത്രം ഒതുക്കരുത്. കാരണം പുതുമുഖങ്ങളെ ലൈംഗികമായി ദുരുപയോഗം ചെയ്യാനുള്ള ഒരുപാധിയായി പ്രസ്ഥാനം ഉപയോഗിച്ചിട്ടുണ്ടോ എന്ന് അറിയേണ്ടതുണ്ട്.

എന്താണ് A M M A യിൽ അംഗത്വത്തിനുള്ള മാനദണ്ഡം?

അപേക്ഷ നൽകുന്നതിനുള്ള രീതി എന്താണ്?

അപേക്ഷ നൽകിയവർക്ക് അംഗത്വം നിഷേധിച്ചിട്ടുണ്ടോ? ഉണ്ടെങ്കിൽ കാരണം രേഖപ്പെടുത്തിയിട്ടുണ്ടോ ?

ഭാരവാഹികളുടെ വീട്ടിൽ പോയിട്ടാണോ ഫോം ഫിൽ ചെയ്യേണ്ടത്?

A M M A അംഗങ്ങളിൽ നിന്നോ അംഗങ്ങളെ കുറിച്ചോ തെറ്റായ പെരുമാറ്റങ്ങളുടെ പേരിൽ പരാതികൾ ലഭിച്ചിട്ടുണ്ടോ? അവ എങ്ങനെ കൈകാര്യം ചെയ്തു? അതിന്റെ റെക്കോർഡ് എന്തൊക്കെയാണ്?

ഈ താര സംഘടനയിലെ പലരും ആരോപണവിധേയർ ആയിട്ടുണ്ടെങ്കിലും ഭൂരിഭാഗം ആളുകളും അത്തരക്കാരല്ല എന്ന് വിശ്വസിക്കാനാണ് എനിക്കിഷ്ടം. അതുകൊണ്ട് തന്നെ

സിനിമയിൽ കാണിക്കുന്ന ധാർമ്മിക രോഷത്തിന്റെ ഒരു തരിയെങ്കിലും യഥാർത്ഥ ജീവിതത്തിലുള്ള ഏതെങ്കിലും നായകന്മാർ ഈ സംഘടനയിലുണ്ടെങ്കിൽ അവർ ഈ സംഘടന  ശുദ്ധീകരിക്കാൻ മുന്നിട്ടിറങ്ങണം.

മുരളി തുമ്മാരുകുടി