ലഹരിയും പോലീസിംഗും

തൃശ്ശൂരിൽ ലഹരിപ്പാർട്ടി അന്വേഷിക്കാനെത്തിയ പോലീസുകാരെ അക്രമിക്കുകയും പോലിസ് വാഹനങ്ങൾ തകർക്കുകയും ചെയ്ത സംഭവം പേടിപ്പെടുത്തുന്നതാണ്.

ലഹരി കഴിച്ചവർക്ക് ശരിയായ ജഡ്ജ്മെൻ്റ് നഷ്ടപ്പെടുന്നു. അപ്പോൾ നിസ്സാര കാര്യങ്ങൾക്ക് പോലും അവർ വലിയ അക്രമം നടത്തിയേക്കാം.

സാഹചര്യങ്ങളെ നേരിടാൻ നമ്മുടെ പോലീസ് കാലാകാലമായി ഉപയോഗിക്കുന്ന ലാത്തിയും റൂൾസ് ഓഫ് എൻഗേജ്മെൻ്റും മതിയാകില്ല. ഇത്തരം സാഹചര്യങ്ങൾ യാതൊരുവിധ ആയുധങ്ങളുമില്ലാതെ കാര്യം ചെയ്യുന്ന പോലീസുകാരെ കാണുമ്പോൾ പേടിയും സഹതാപവും ദുഃഖവും തോന്നാറുണ്ട്.

മാറുന്ന കാലത്ത് ലോകത്ത് മറ്റു രാജ്യങ്ങളിൽ ചെയ്യുന്നത്പോലെ അക്രമികളെ നേരിടാൻ ടേസർ ഗൺ പോലുള്ള ആധുനിക ഉപകരണങ്ങളും അത് ഉപയോഗിക്കാനുള്ള പരിശീലനവും നിയമങ്ങളും ഉണ്ടാകണം.

ധൈര്യവും ലാത്തിയും മാത്രം കൈയിൽ കരുതി ലഹരി ഉപയോഗിക്കുന്നവർ ഉൾപ്പെടെയുള്ള അക്രമികളെ നേരിടുന്ന രീതി തുടർന്നാൽ അത് നമ്മുടെ പോലീസുകാർക്ക് ഗുരുതരമായ പരിക്കേൽക്കുന്ന, ജീവൻ തന്നെ നഷ്ടപ്പെടുന്ന അവസ്ഥ ഉണ്ടാകുന്ന കാലം വിദൂരമല്ല.

മുരളി തുമ്മാരുകുടി