സുരക്ഷിതമല്ലാത്ത സുരക്ഷ…

ബോംബയിൽ ഇന്ദിര ഗാന്ധി ഇൻസ്റ്റിറ്റ്യൂട്ട് ഓഫ് ഡെവലപ്പ്മെന്റ് റിസേർച്ചിൽ ജോലി ചെയ്യുന്ന കാലത്ത് ഒരു ചെറിയ കാന്പസിനകത്തായിരുന്നു ജോലിയും താമസവും. അവിടെ പൊലീസുകാരെ പോലെ കാക്കി യൂണിഫോമും തൊപ്പിയുമുള്ള പതിനഞ്ചു സെക്യൂരിറ്റിക്കാരുണ്ട്. കൂടാതെ ഉയർന്ന യൂണിഫോമിൽ രണ്ട് ഇൻസ്പെക്ടർമാരും. പുറത്തു നിന്നും വരുന്നവരുടെ പേരും വാഹനത്തിന്റെ നന്പറും എഴുതിവെക്കുക എന്നതാണ് അവരുടെ പ്രധാന ജോലി. രാത്രിയായാൽ പിന്നെ അധികം പണിയൊന്നുമില്ല. ഹോട്ടലുകളിലെ പോലുള്ള വേക്ക് അപ്പ് കാൾ അവർ തന്നിരുന്ന ഒരു സർവീസ് ആയിരുന്നു. അവിടെ ഒരു വർഗ്ഗീസ് സാബ് ഇൻസ്‌പെക്ടറായി ഉണ്ടായിരുന്നു. ഒരിക്കൽ എയർപോർട്ടിൽ പോകാൻ എന്നെ വിളിച്ചെഴുന്നേല്പിക്കണമെന്ന് ഞാൻ അദ്ദേഹത്തോട് ആവശ്യപ്പെട്ടിരുന്നു. പക്ഷെ ആൾ വിളിച്ചില്ല, ഭാഗ്യത്തിന് ഞാൻ തന്നെ ഉണർന്നു. താഴെ ചെന്നപ്പോൾ വർഗീസ് സാബ് ഇരുന്നുറങ്ങുകയാണ്.