ഖരമാലിന്യത്തെ പറ്റി തന്നെ…

ഖരമാലിന്യ സംസ്കരണം എന്നത് പരിഹാരം ഇല്ലാത്ത പ്രശ്നം ഒന്നുമല്ല. ലോകത്തിലെ എത്രയോ വൻ നഗരങ്ങൾ എത്രയോ വർഷങ്ങൾ ആയി ഖരമാലിന്യ പ്രശ്നങ്ങൾ വിജയകരമായി കൈകാര്യം ചെയ്തുകൊണ്ടിരിക്കുന്നു. കേരളത്തിലാണെങ്കിൽ വൻനഗരങ്ങൾ പോലും ഇല്ല. എന്നിട്ടും എന്തുകൊണ്ടാണ് നമ്മുടെ നഗരങ്ങൾ ചീഞ്ഞു നാറുന്നത് ?

അടിസ്ഥാനപരമായി മൂന്നു കാരണങ്ങൾ കൊണ്ടാണ് കേരളത്തിൽ ഖരമാലിന്യം ഒരു പ്രശ്നമായി തുടരുന്നത്. ഒന്നാമത് ഖരമാലിന്യ നിർമ്മാർജനം എന്നത് ചിലവുള്ള കാര്യമാണ്. അതിന്റെ യഥാർത്ഥ ചിലവ് വഹിക്കാൻ പാകത്തിന് ടാക്സ് കൊടുക്കാൻ നാം തയ്യാറല്ല. രണ്ടാമത് ഖരമാലിന്യ സംസ്കരണ ശാലകൾ നമ്മുടെ ചുറ്റും സ്ഥാപിക്കുന്നതിന് നാം എതിരാണ് (Not In My Back Yard, or NIMBY). മൂന്നാമത് ഖരമാലിന്യ സംസ്കരണത്തിന്റെ വിജയകരമായ മാതൃകകൾ നമുക്ക് ചുറ്റുമില്ല. വിളപ്പിൽ ശാല തൊട്ട് ബ്രഹ്മപുരം വരെ എല്ലാം നാറ്റക്കേസാണ്.