ഒരു സിവിൽ എൻജിനീയർ ആയിട്ടാണ് പഠനം തുടങ്ങിയത് എന്ന് പറഞ്ഞല്ലോ. റോഡും പാലവും റെയിലും കെട്ടിടവും ഒക്കെ നിർമ്മിക്കുന്ന ജോലിയാണത്. കോളേജിൽ നന്നായി പഠിപ്പിക്കുകയും ചെയ്തു.
എന്നാൽ ഈ നിർമ്മിച്ചുവെക്കുന്ന പാലവും കെട്ടിടവും ഒക്കെ ഒരു കാലത്ത് പൊളിക്കേണ്ടി വരുമോ?, വന്നാൽ അതെങ്ങനെ ചെയ്യാം?, പിന്നീടൊരു കാലത്ത് പൊളിക്കണം എന്ന് കരുതി നിർമ്മിക്കുമ്പോൾ തന്നെ എന്തെങ്കിലും കരുതൽ എടുക്കേണ്ടതുണ്ടോ എന്നൊന്നും ആരും അന്ന് പഠിപ്പിച്ചില്ല, ഇപ്പോഴും പഠിപ്പിക്കുന്നില്ല. കാരണം നമ്മൾ നിർമ്മിക്കുന്ന വീടുകളും മറ്റും എല്ലാക്കാലത്തേക്കും നിലനിൽക്കുമെന്നാണ് നിർമ്മിക്കുന്ന കാലത്ത് നമ്മൾ ചിന്തിക്കുന്നത്. ഇത് ശരിയല്ല.
ഓരോ മഴക്കാലത്തും മുംബൈയിൽ ഒന്നോ അതിലധികമോ ഫ്ലാറ്റുകൾ തകർന്നുവീഴും. പത്തോ അതിലധികമോ ആളുകൾക്ക് ജീവഹാനി സംഭവിക്കും. നിങ്ങൾ ഇതൊക്കെ ശ്രദ്ധിക്കാറുണ്ടോ? ഇതിനി കൂടിവരികയേയുള്ളു. മുംബൈയിൽ മാത്രമല്ല, ചെന്നെയിലും ഡൽഹിയിലും കൊച്ചിയിലും കേരളത്തിലൊട്ടാകെയും ഇത് സംഭവ്യമാണ്. ഇന്ത്യയിൽ ആദ്യമായി ഫ്ലാറ്റുകൾ തലപൊക്കിയത് മുംബൈയിലാണ്. അതുകൊണ്ടാണ് അവിടുത്തെ ഫ്ലാറ്റുകൾ ആദ്യം വീഴുന്നത്. ഇന്ന് ഞാൻ നാളെ നീ!
ഇപ്പോൾ കേരളത്തിലുള്ള കെട്ടിടങ്ങളിൽ ബഹുഭൂരിപക്ഷവും ഇരുപതാം നൂറ്റാണ്ടിലുണ്ടാക്കിയതാണ്. ചെങ്കല്ലിലും മരത്തിലും ഉണ്ടാക്കിയ വീടുകൾ (അതുതന്നെ 1980 കൾ വരെ പുതിയതായി ഉണ്ടാക്കിയിരുന്നു) മിക്കതും ഇല്ലാതായിക്കഴിഞ്ഞു. ഇന്നു നമ്മൾ കോൺക്രീറ്റിലും ഇഷ്ടികയിലും പണിതതും മാറിവരും, സംശയം വേണ്ട.
ഇവിടെയാണ് ഫ്ലാറ്റുകൾ നമുക്ക് പണിതരുന്നത്. നമ്മൾ ഒറ്റക്കുള്ള വീട് പണിയുമ്പോൾ എപ്പോൾ വേണമെങ്കിലും നമുക്കത് പൊളിക്കാം. പക്ഷെ ഫ്ലാറ്റ് ആകുമ്പോൾ എല്ലാവരുടെയും സമ്മതം വേണം. സാധാരണഗതിയിൽ ഏതാണ്ട് ഒരേ സാമ്പത്തികസ്ഥിതിയിൽ ഉള്ളവരാണ് എല്ലാ ഫ്‌ളാറ്റുകളിലും. എന്നാൽ തലമുറ മാറിവരുന്നതോടെ (മുപ്പത് വർഷത്തിൽ) കാര്യങ്ങൾ മാറിമറിയും. ഫ്ലാറ്റിൽ താമസിക്കുന്നവരുടെ സാമ്പത്തികസ്ഥിതി ഉയരും, ചിലരുടേത് താഴും. കൂടുതൽ സമ്പാദ്യമുള്ളവർ പുതിയ ഫ്ളാറ്റിലേക്കോ വില്ലയിലേക്കോ താമസം മാറും. സാമ്പത്തികസ്ഥിതി കുറഞ്ഞ പുതിയ താമസക്കാർ വരും. അതേസമയം ഫ്ലാറ്റിന്റെ അറ്റകുറ്റപ്പണികൾ തീരുമാനിക്കുന്നത് ഫ്ളാറ്റിലെ ഏറ്റവും വരുമാനം കുറഞ്ഞ ആളെക്കൂടി കണക്കിലെടുത്തായിരിക്കും. അതോടെ അറ്റകുറ്റപ്പണികൾ കുറഞ്ഞുവരും. ഫ്ലാറ്റിന്റെ വില പിന്നെയും കുറയും. സുരക്ഷ അവതാളത്തിലാകും. മറ്റു നാടുകളിൽ ഇടക്കിടക്ക് ബിൽഡിങ് ഇൻസ്‌പെക്ടർ വന്നു നോക്കി സുരക്ഷിതമല്ലെങ്കിൽ ആളുകളെ ഒഴിപ്പിക്കുന്ന നടപടിയുണ്ട്. നമ്മുടെ നാട്ടിൽ ഒരിക്കൽ കെട്ടിടം പണിതാൽ പിന്നെ ഇൻസ്‌പെക്ഷനുമില്ല, ഇൻസ്പെക്ടറുമില്ല.
ഇന്ത്യയിലെ പ്രത്യേകസാഹചര്യത്തിൽ രണ്ടു കുഴപ്പങ്ങൾ കൂടിയുണ്ട്. മുംബൈയിൽ ഇപ്പോൾത്തന്നെ മധ്യവർഗ്ഗത്തിന് ഫ്ലാറ്റ് കൈയിൽ ഒതുങ്ങാതായി. അപ്പോൾ ഒരു ഫ്ളാറ്റിനെ മക്കൾക്കായി മുറിച്ച് രണ്ടാക്കാൻ നോക്കും. അതല്ലെങ്കിൽ പകുതി ഭാഗം വാടകക്ക് കൊടുക്കാൻ പാകത്തിനാക്കും. അങ്ങനെ ഒറിജിനൽ പ്ലാനിൽ ഇല്ലാത്ത അനധികൃത നിർമ്മാണം നടക്കും. അതും പോരാഞ്ഞിട്ട് സമ്പത്തുണ്ടാകാനോ മറ്റ് വിഷമങ്ങൾ മാറാനോ ഫ്ലാറ്റുകൾ വാസ്തുക്കാരനെ വിളിച്ചു കാണിക്കാനും മതി. അയാൾ ആകുന്ന പോലെ ഫ്ലാറ്റിന്റെ ചുമർ തൊട്ട് ബാൽക്കണി വരെ കുത്തിപ്പൊളിപ്പിക്കും. ഈ രണ്ടു കാര്യത്തിലും എൻജിനീയർമാരുടെ നിർദ്ദേശങ്ങൾ ഒന്നും ഉണ്ടാവില്ല, തോന്നിയതു പോലെയാണ് കൂട്ടലും കുറക്കലും ഒക്കെ. നമ്മളാരും അയൽക്കാരന്റെ കാര്യത്തിൽ ഇടപെടാത്തതിനാൽ ഒറിജിനൽ ഡിസൈനിൽനിന്നും ഫ്ലാറ്റ് മാറും. അങ്ങനെയങ്ങനെ ഒരുദിവസം ഫ്ലാറ്റ് തലകുത്തി വീഴും, അധികപ്പണി കാണിച്ചവരും അല്ലാത്തവരും ഒക്കെ അടിയിലാകും. രണ്ടു ദിവസം പത്ര വാർത്ത, തീർന്നു.
ഒരു പത്തോ പതിനഞ്ചോ വർഷം കൂടി കഴിഞ്ഞാൽ ഇതൊക്കെ നാട്ടിലും സാധാരണമാകും. അതൊഴിവാക്കണമെങ്കിൽ ഇപ്പോൾ തന്നെ പഴയ കെട്ടിടങ്ങൾ സ്ഥിരമായി പരിശോധിക്കാനുള്ള സംവിധാനം ഉണ്ടാകണം. സുരക്ഷിതമല്ലാത്ത കെട്ടിടങ്ങൾ പൊളിച്ചു കളയാൻ വകുപ്പുണ്ടാകണം. പത്തോ ഇരുപതോ തൊഴിലാളികൾ രണ്ടു വടവും ഒരു ജെ സി ബി യും ആയി ആഞ്ഞു വലിച്ചാണ് ഇപ്പോൾ നാട്ടിൽ കെട്ടിടങ്ങൾ പൊളിക്കുന്നത്. പതിവുപോലെ അത് കണ്ടുനിൽക്കാൻ നൂറു പേർ ചുറ്റും. ഇന്നലെ ശ്രീഹരി ഇതിനെപ്പറ്റി എഴുതിയിരുന്നു. എംജി റോഡിൽ പത്തുനിലയുള്ള കെട്ടിടം എങ്ങനെ പൊളിക്കും എന്ന് ചിന്തിച്ചിട്ടുണ്ടോ?. ഇപ്പോൾ രണ്ടു നിലക്കെട്ടിടങ്ങൾ പോലും പൊളിക്കുമ്പോൾ അപകടവും മരണവും പതിവാണ്. നാല്പത് നിലയുള്ള കെട്ടിടം പൊളിക്കാൻ ഇപ്പോഴത്തെ സാങ്കേതികവിദ്യ പോരാ. കെട്ടിടം നിർമ്മിക്കുന്ന എൻജിനീയറിങ് പോലെ കെട്ടിടം പൊളിക്കുന്ന എഞ്ചിനീയറിങ്ങും നമ്മുടെ കുട്ടികൾ പഠിക്കേണ്ടിയിരിക്കുന്നു. കെട്ടിടത്തിന് സ്ഥലം കാണുമ്പോഴും നിർമ്മിക്കുമ്പോഴും നിർമ്മാണ വസ്തുക്കൾ തിരഞ്ഞെടുക്കുമ്പോഴും ഈ കെട്ടിടം ഒരു കാലത്ത് പൊളിക്കേണ്ടി വരും എന്ന ചിന്ത കൂടിയുണ്ടായാൽ കൂടുതൽ നന്ന്.
Leave a Comment