ഔദ്യോഗിക സ്ഥാനങ്ങളിൽ ഇരിക്കുന്നവരെയും മുതിർന്നവരേയും ‘സാർ’ എന്ന് വിളിക്കുന്നത് നമ്മുടെ ഒരു കൊളോണിയൽ ഹാങ്ങ് ഓവർ ആണ്. ഈ ലോഡ് ഇവിടെ ഇറക്കിപ്പോയ ബ്രിട്ടീഷുകാർ ആകട്ടെ ‘സാർ’ സീനൊക്കെ പണ്ടേ വിട്ടു.
കേരളത്തിൽ നിന്ന് വരുന്നവരോടും കേരളത്തിൽ തന്നെ ഉള്ളവരോടും ഞാൻ എന്നെ സാർ എന്ന് വിളിക്കരുതെന്ന് എപ്പോഴും പറയാറുണ്ട്. അധികം പേരൊന്നും അനുസരിക്കാറില്ല. ശീലിച്ച കാര്യമല്ലേ.
എന്നാൽ ഞാൻ നാട്ടിൽ പോകുന്പോൾ പലരെയും ചിലപ്പോൾ സാർ എന്ന് വിളിക്കാറുണ്ട്. അത് ശീലം കൊണ്ടല്ല. എൻറെ ബോസിനെയും മറ്റനവധി രാജ്യങ്ങളിലെ ഉയർന്ന ഉദ്യോഗസ്ഥരേയും പേര് വിളിക്കുന്നതു പോലെ നാട്ടിലെ വില്ലേജ് ഓഫീസിൽ ചെന്ന്, “ഗോപാലാ, എൻറെ പോക്കുവരവിന്റെ കാര്യം എന്തായി” എന്നു ചോദിച്ചാൽ പിന്നെ ഏറെ വരവും പോക്കും വേണ്ടി വരും. അപ്പോൾ മാറ്റം നമ്മൾ മാത്രം വിചാരിച്ചാൽ കൊണ്ടുവരാൻ സാധിക്കില്ല.
എന്നാലും രാഹുൽ ഗാന്ധി ചെയ്തത് ഒരു നല്ല തുടക്കമാണ്. കൊളോണിയൽ കാലത്തുണ്ടായിരുന്ന അറ്റസ്റ്റേഷൻ ഒന്നും വേണ്ട എന്ന് മോഡിജി പറഞ്ഞതു പോലെ ഇനി സാർ വിളി ഒന്നും വേണ്ട എന്ന് അടുത്ത സർക്കാരും തീരുമാനിക്കട്ടെ.
അതുവരെ എൻറെ വായനക്കാരോട് ഒരിക്കൽ കൂടി പറയാം. എന്നെ മുരളി എന്ന് ആര് വിളിച്ചാലും, എത്ര പ്രായക്കുറവുള്ളവർ ആയാലും, സത്യത്തിൽ എനിക്ക് ഒരു ബുദ്ധിമുട്ടും ഇല്ല.
https://www.manoramaonline.com/women/work-and-life/2019/03/14/dont-call-me-sir-call-me-rahul-says-rahulgandhi-to-college-students.html
മുരളി തുമ്മാരുകുടി
Leave a Comment