വ്യത്യസ്തമായ ഒരു സിനിമ ഇന്റർവ്യൂ…

സിനിമ രംഗത്ത് നിന്നുള്ള ഇന്റർവ്യൂകൾ ഞാൻ ഒരിക്കലും വായിക്കാറോ കാണാറോ ശ്രദ്ധിക്കറോ ഇല്ല. ഏറെ സമയം ലാഭിക്കാം എന്നത് മാത്രമല്ല ഇതിന്റെ കാരണം. കൃത്രിമത്വമാണ് സിനിമ ഇന്റർവ്യൂവിന്റെ മുഖമുദ്ര. അഭിനയം കണ്ട് മതിമറന്ന് ‘കട്ട്’ പറയാൻ മറന്ന പൊട്ടക്കഥ മുതൽ ‘എല്ലാവരും പരസ്പരം സ്നേഹബഹുമാനത്തോടെ ജീവിക്കുന്ന സിനിമ ലോകം’, ‘പുറം ലോകം അറിയുന്നത് പോലല്ല, സർവ്വഗുണ സന്പന്നനായ നായകൻ’, ‘സിനിമക്ക് വേണ്ടി നായകന്മാരും നായികമാരും നടത്തുന്ന ത്യാഗങ്ങൾ’ ഇങ്ങനെയുള്ള സ്ഥിരം വാചകക്കസർത്തൊക്കെ മല്ലുവുഡിൽ മാത്രമല്ല കോളിവുഡിലും നോളിവുഡിലും തൊട്ട് ബോളിവുഡ് വരെ ഉണ്ട്. അതിനൊരു കാരണവുമുണ്ട്. സിനിമ എന്നത് ഊതിപ്പെരുപ്പിച്ച വ്യക്തിത്വങ്ങളുടെ ലോകമാണ്. അവർക്കൊക്കെ ഇമേജ് വളരെ പ്രധാനമാണ്. ഹോളിവുഡിലെ മുതിർന്ന സെലിബ്രിറ്റികൾക്കൊക്കെ കമ്മൂണിക്കേഷൻ ഉപദേശകർ വരെ കാണും. അവർ പറയുന്നത് പോലെയാണ് സെലിബ്രിറ്റികൾ ജീവിക്കുന്നത്. ഉദാഹരണത്തിന് അവർ പറയുന്ന മാധ്യമങ്ങളോടു മാത്രമേ സെലിബ്രിറ്റികൾ സംസാരിക്കൂ. അവർ മുൻകൂട്ടി സമ്മതിക്കുന്ന ചോദ്യങ്ങളേ ചോദിക്കപ്പെടൂ, ഉത്തരങ്ങൾ അവരാണ് എഴുതിക്കൊടുക്കുന്നത്. ട്വീറ്റ് തൊട്ട് ബ്ലോഗ് വരെയുള്ള സെലിബ്രിറ്റി കമ്മ്യൂണിക്കേഷൻ നമ്മൾ കാണുന്നതും കേൾക്കുന്നതും പൊതുവെ ‘ഭൂത ലിപി’ ആണ്. ഇങ്ങനെ ‘കൃത്രിമ ബുദ്ധിയിൽ’ നിന്നും വരുന്ന ഇന്റർവ്യൂവും ബ്ലോഗും വായിച്ചു സമയം കളയേണ്ട കാര്യമില്ലല്ലോ.